❝𝐁𝐞𝐲𝐨𝐮𝐧𝐝 𝐦𝐨𝐮𝐧𝐭𝐚𝐢𝐧𝐬 𝐭𝐡𝐞𝐫𝐞 𝐚𝐫𝐞 𝐦𝐨𝐮𝐧𝐭𝐚𝐢𝐧𝐬❞

“𝐃𝐞̀𝐲𝐞̀ 𝐦𝐨̀𝐧, 𝐠𝐞𝐧 𝐦𝐨̀𝐧” ဆိုတဲ့ ဟေတီလူမျိုးတွေရဲ့စကားပုံ(𝐇𝐚𝐢𝐭𝐢𝐚𝐧 𝐩𝐫𝐨𝐯𝐞𝐫𝐛) တစ်ခုရှိတယ်။ 

မြန်မာလို့ အဓိပ္ပာယ်က 

“တောင်တွေရဲ့နောက်မှာ တောင်တွေအများရှိတယ်” 

“𝐁𝐞𝐲𝐨𝐮𝐧𝐝 𝐦𝐨𝐮𝐧𝐭𝐚𝐢𝐧𝐬 𝐭𝐡𝐞𝐫𝐞 𝐚𝐫𝐞 𝐦𝐨𝐮𝐧𝐭𝐚𝐢𝐧𝐬.”

အနက်အဓိပ္ပာယ်က ဒီအခက်အခဲတစ်ခုပြီးသွားလဲ နောက်အခက်ခဲတွေရှိသေးတယ်။ တစ်ခုကျော်လွှားနိုင်တယ်ဆိုပြီး ဂုဏ်မမြင့်နေပဲ နှိမ့်ချနေဖို့ (𝐡𝐮𝐦𝐢𝐥𝐢𝐭𝐲)။ စိန်ခေါ်မှုတွေ အများကြီးကျန်သေးတယ်ဆိုတာသိဖို့ (𝐄𝐧𝐝𝐥𝐞𝐬𝐬 𝐜𝐡𝐚𝐥𝐥𝐞𝐧𝐠𝐞𝐬) နဲ့ ကြံကြံခံရင်ဆိုင်နိုင်နေဖို့ (𝐑𝐞𝐬𝐢𝐥𝐢𝐞𝐧𝐜𝐞) ဆိုတဲ့ အဓိပ္ပာယ်ကိုပေးတယ်လို့ဆိုတယ်။

အဲဒီစကားပုံကို မြင်ပြီး ၉တန်း ၁၀တန်းကျောင်းသားဘဝက မြန်မာစာသင်ပေးတဲ့ ကျူရှင်ဆရာမ ခဏခဏရွတ်ရွတ်ပြတဲ့ ကဗျာတစ်ပုဒ်ကိုစိတ်ထဲသွားသတိရတယ်။ အဲ့ဆရာမက ကဗျာကို အသေချစ်တာ။ စာသင်နေရင်း တန်းလန်းနဲ့ အကြောင်းတစ်ခုခုတိုက်ဆိုင်လာတိုင်း “တီချယ် အင်မတန်ကြိုက်တဲ့ ကဗျာလေးတစ်ပုဒ်ရှိတယ်” ဆိုပြီး စင်ပေါ်ကနေ ကဗျာတွေရွတ်ရွတ်ပြတော့တာပဲ။ (သူကျေးဇူးကြောင့်ပဲ ၁၀တန်းပြီးတော့ ကျွန်တော် ကဗျာတွေစစိတ်ဝင်စားတော့တာပဲ။)

သူခဏခဏရွတ်ပြတတ်တဲ့ ကဗျာတွေထဲက တစ်ပုဒ်ရဲ့နာမည်က “ထိပ်ဆုံးသို့” ဆိုတာ ငွေတာရီ ရေးထားတဲ့ ကဗျာလေး။ နောက်ပိုင်းတွေ မမှတ်မိတော့လို့ပြန်ရှာထားတယ်။ 

 

“ထိပ်ဆုံးသို့”

တတောင်ပေါ် တတောင်ဆင့်

တောင်အမြင့် ပတ်ခြံရံ။

 

တတောင် ဆုံးပြန်တော့

တလုံး ကျန်ပြန်ပေသမို့

ဖန်ဖန်လေ အားအင်နှိုးလို့ရယ်

ကြိုး လျှောက်ရပြန်။

 

ခါတလေ တကယ်ပန်းတာကြောင့်

တော်ပါပြီ ဆက်မလှမ်းချင်ဘု

ရပ်တန်းက ရပ်မယ်ကြံ

အမှန်တော့ ဖြစ်နိုင်မလား။

 

စခဲ့မိဟာပေါ့

တနေ့မှာ ဆုံးရာရောက်ပါလိမ့်

အားလျှော့ကာ ဆုတ်ချင်စမ်းပါနဲ့

စိတ်နွမ်း အသာဖြေဦး

မာလာငွေ ကန်ရေအေးရယ်နှင့်

ငှက်တေးကို အာရုံဆင်လို့

မူတသွင် အားအင်သစ်လိုက်ပါ့

ချစ်ဖွယ့်လူသား။

 

အဆုံးသတ် အပိတ်လေးကို ကျွန်တော် အင်မတန်သဘောကျတယ်။ 

တစ်တောင်ပြီးလဲ နောက်တစ်တောင်ရှိသေးတယ်။ထပ်ခါတလဲလဲ အားစိုက်ပြီးပြန်လုပ်ရတော့ တစ်ခါတစ်လေပင်ပန်းပြီး ရပ်မယ်ကြံပြန်တော့ လဲ သေချာစဉ်းစားရင် ရပ်လို့မရပြန်ဘူး။ စပြီးရင် အဆုံးထိသွားရမှာမို့ လက်မလျော့နဲ့ဦး။ ပင်ပန်းရင် ရေကန်လေးဘာလေးနားမှာထိုင် အေးဆေးနား။ တောတောင်သဘာဝ ကျေးငှက်သံစဉ်တွေကို နားထောင်ရင်း အင်အားမွေးပြီး ရှေ့ဆက်တဲ့သူဟာ အင်မတန်ချစ်စရာကောင်းတဲ့လူသားပါ ဆိုပြီး အားပေးတဲ့စကား နဲ့အဆုံးသတ်ထားတာ အင်မတန်လှပတယ်။

ဆရာမနာမည်တော့ မမှတ်မိတော့ဘူး။ ၉ တန်း ၁၀တန်း ကျူရှင်တူတူတက်ခဲ့တဲ့ သူငယ်ချင်းတွေတော့ ဒီကဗျာကို မှတ်မိနေလိမ့်မယ်လို့ ယုံတယ်။

Thanks for reading.